ملک میں مکمل شٹر ڈاون ہڑتال ،بجلی اور پیٹرولیم قیمتیں کم کرنیکا مطالبہ

امیر جماعت اسلامی پاکستان سراج الحق کی اپیل پر بجلی کے بلوں، پٹرول مصنوعات کی قیمتوں اور مہنگائی میں ہوشربا اضافے کے خلاف لاہور، گوجرانوالہ ، فیصل آباد،سیالکوٹ ، حافظ آباد، قصور، ساہیوال ، میاں چنوں ، چنیوٹ ،جھنگ،ٹوبہ ٹیک سنگھ،ناروال ،شیخوپورہ ،ننکانہ ، اوکاڑہ سمیت پورے ملک میں مکمل شڑڈاون ہڑتال کی گی۔مارکیٹیںاور تمام کاروباری مراکز بند رہے ۔ تاجر برادری ،صنعت کار ،پرائیویٹ اسکولز و کالجز ایسوسی ایشنز،علما ء اکرام ،وکلاء برادری کی جانب سے ہڑتال کی مکمل حمایت کی گئی تھی ۔

مرکزی شاہراہوں پر ہڑتالی کیمپس لگائے گے ،جن میں ذمہ داران جماعت ، کارکنان کے علاوہ مہنگائی کے ستائے عوام الناس کی بڑی تعداد نے شرکت کی ۔لوگوں نے ہاتھوں میں مہنگائی کے خلاف پینا فلیکس، پلے کارڈز ، بینر اٹھا رکھے تھے جن پر حکومت اور مہنگائی کے خلاف نعرے درج تھے ۔ ،کراچی کے تاجروں کی جانب سے بجلی کے اضافی بلوں، مہنگائی کے خلاف شٹرڈائون ہڑتال کے باعث شہر کی تھوک اور بڑی مارکیٹیں بند ر رہی ؎ تاہم محلوں کی سطح پر چھوٹی دکانیں کھلی رہیں۔

دریں اثنا پنجاب بار کونسل کی بھی مہنگائی کے خلاف ماتحت عدالتوں میں ہڑتال رہی۔ کراچی میں گزشتہ روز بھی بجلی کے بلوں میں اضافوں کے خلاف تاجروں کی طرف سے مکمل ہڑتال کی گئی، جس کے نتیجے میں تمام ہول سیل مارکیٹیں اور بڑے بازار مکمل طور پر بند رہے۔ کراچی تاجر ایکشن کمیٹی نے حکومت کو 72 گھنٹوں کا الٹی میٹم دیتے ہوئے کہا کہ اگر بجلی کے بلوں میں کیے گئے اضافوں کو واپس نہ لیا گیا تو ایک ہفتے سے 10 دن تک کے طویل دورانیے کی شٹر ڈاؤن ہڑتال کریں گے،

جس سے ملک کی تمام چھوٹی بڑی معاشی سرگرمیوں کا پہیہ جام ہوجائے گا۔ شٹر ڈاؤن ہڑتال کی کال کراچی کے چھوٹے تاجروں نے دی تھی، جس کو کے سی سی آئی کی جانب سے مکمل طور پر سپورٹ کیا گیا تھا۔ کے سی سی آئی کے صدر محمد طارق یوسف نے کہا کہ ہمیں امید ہے کہ حکومت بحران سے نکلنے کیلیے کوئی مناسب حل تلاش کرلے گی، کچھ روز کے بعد ہم اجلاس منعقد کرکے صورتحال کا جائزہ لیں گے، اور مناسب فیصلے کریں گے۔علاوہ ازیں، ایف پی سی سی آئی کے صدر عرفان اقبال شیخ نے کہا کہ حکومت دیوار پر لکھے کو پڑھنے میں ناکام ہورہی ہے، دوبارہ پیٹرول کی قیمتوں میں اضافہ کرکے مہنگائی کی ایک نئی لہر کو جنم دینے کی بنیاد رکھ دی ہے، جس کے نتیجے میں ملک کی ایکسپورٹ بری طرح سے متاثر ہوگی،

سب سے خوفناک بات یہ ہے کہ پیٹرولیم لیوی بڑھ کر 60 روپے لیٹر ہوچکی ہے، ہمیں معاشی بحران سے نکلنے کیلیے آؤٹ آف دا باکس حل ڈھونڈنے ہوں گے۔ راولپنڈی میں خواجہ سراؤں نے بجلی کے بھاری بلوں کے خلاف احتجاجی مظاہرہ کیا، مظاہرین نے مری روڈ کو بلاک کرکے نعرے بازی کی جس سے ٹریفک روانی متاثر ہوئی۔راولپنڈی شی میل ایسوسی ایشن کی چئیرپرسن الماس بوبی کی کال پر خواجہ سراؤں کی بڑی تعداد اسلام آباد الیکٹرک سپلائی کمپنی (آئیسکو) آفس مریڑ چوک آفس کے باہر جمع ہوئی اور اختجاج ریکارڈ کرایا۔مظاہرین نے ہاتھوں میں پلے کارڈز اور بینرز اٹھا رکھے تھے جن پر نعرے درج تھے۔ مظاہرین خواجہ سراؤں نے مری روڈ تک مارچ کیا اور مریڑ چوک کو بند کرکے سینے پیٹتے رہے۔