پاک فوج کو کالعدم ٹی ٹی پی کی پناہ گاہوں پر تشویش ہے،دہشتگردی کا ناسور جڑ سے اکھاڑپھینکیں گے،آرمی چیف

آرمی چیف جنرل سیّد عاصم منیر نے کہا ہے کہ مسلح افواج ملک سے دہشت گردی کے ناسور کو جڑ سے اکھاڑ پھینکنے تک آرام سے نہیں بیٹھیں گی، پاکستان کی مسلح افواج کو افغانستان میں کالعدم ٹی ٹی پی کو محفوظ پناہ گاہوں پر شدید تحفظات ہیں،توقع ہے افغان عبوری حکومت اپنی سرزمین کو کسی بھی ملک کے خلاف دہشت گردی کے لیے استعمال کرنے کی اجازت نہیں دے گی۔

آئی ایس پی آر کے مطابق آرمی چیف نے جمعہ کو کوئٹہ گیریژن کا دورہ کیا جہاں انہیں ژوب میں ہونیوالے حالیہ دہشت گردانہ حملے کے بارے میں بریفنگ دی گئی۔ آرمی چیف نے شہداء کو زبردست خراج تحسین پیش کیا۔ سی ایم ایچ کوئٹہ میں زخمی فوجیوں کی عیادت کی اور قوم کے لیے ان کی خدمات کو سراہا اور ان کے عزم کو سراہا۔

آئی ایس پی آر کے سپہ سالار کا کہنا ہے کہ پاکستان کی مسلح افواج کو افغانستان میں ٹی ٹی پی کو دستیاب محفوظ پناہ گاہوں اور کارروائیوں کی آزادی پر شدید تحفظات ہیں۔ توقع ہے کہ افغان عبوری حکومت حقیقی معنوں میں اور دوحہ معا ہدے میں کیے گئے وعدوں کے مطابق اپنی سرزمین کو کسی بھی ملک کے خلاف دہشت گردی کے لیے استعمال کرنے کی اجازت نہیں دے گی۔

پاکستان میں دہشت گردی کی کارروائیوں میں افغان شہریوں کی شمولیت ایک اور اہم تشویش کاپہلو ہے جس پر توجہ دینے کی ضرورت ہے۔ اس طرح کے حملے ناقابل برداشت ہیں اور پاکستان کی سیکیورٹی فورسز کی جانب سے موثر جوابی کارروائی ہوگی۔دہشت گردوں کے خلاف آپریشن بلاامتیاز جاری رہے گا اور مسلح افواج ملک سے دہشت گردی کے ناسور کو جڑ سے اکھاڑ پھینکنے تک آرام سے نہیں بیٹھیں گی۔قبل ازیں آمد پر کور کمانڈر کوئٹہ نے آرمی چیف کا استقبال کیا۔