قومی و صوبائی اسمبلی کے انتخابات کے لیے ڈرافٹ پولنگ سکیم تیار

الیکشن کمیشن نے قومی و صوبائی اسمبلی کے انتخابات کے لیے ڈرافٹ پولنگ سکیم تیار کر لی، آر اوز کو تعیناتی کے ایک ہفتے بعد پولنگ سٹیشن کی فہرستیں فراہم کر دی جائیں گی۔ ذرائع کے مطابق ملک بھر میں عام انتخابات کے انعقاد کے معاملہ پر الیکشن کمیشن نے انتخابات کیلئے ڈرافٹ پولنگ سکیم تیار کر لی ہے جس کے مطابق ملک بھر میں 93 ہزار 371 پولنگ سٹیشن قائم کیے جائیں گے، پنجاب میں 49 ہزار 871 پولنگ سٹیشن قائم ہوں گے، پنجاب میں 14 ہزار 960 پولنگ سٹیشن انتہائی حساس اور 9 ہزار 974 حساس، 24 ہزار 937 نارمل پولنگ سٹیشن ہوں گے ۔کے پی میں 15708 پولنگ سٹیشن قائم کیے جائیں گے، کے پی میں 4 ہزار 296 انتہائی حساس، 6 ہزار 549 پولنگ سٹیشن حساس قرار دیئے گئے ہیں ۔ ذرائع کے مطابق سندھ میں 19 ہزار 348، بلوچستان میں 5 ہزار 15 پولنگ سٹیشن قائم ہوں گے، سندھ میں 4 ہزار 823 انتہائی حساس، 14 ہزار 525 پولنگ سٹیشن حساس قرار، بلوچستان میں 2 ہزار 83 انتہائی حساس، 2 ہزار 68 پولنگ سٹیشن حساس قرار، اسلام آباد میں 1 ہزار 41 پولنگ سٹیشن بنائے جائیں گے، وفاقی دارلحکومت میں 326 انتہائی حساس، 221 پولنگ سٹیشن حساس قرار دے دیے گئے۔ ذرائع کا مزید کہنا ہے کہ آر اوز کو تعیناتی کے ایک ہفتے بعد پولنگ سٹیشن کی فہرستیں فراہم کر دی جائیں گی،انتخابات سے 2 ماہ قبل ڈی آر اوز، آر اوز اور اے آر اوز کی تعیناتی کی جائے گی، پریذائیڈنگ افسران، اسسٹنٹ پولنگ افسران، پولنگ افسران کی فہرست تیار ہے۔