ملکی سلامتی پر سمجھوتہ نہیں ہوگا ، قومی سلامتی کمیٹی

سیاسی و عسکری قیادت کا دہشتگردی کیخلاف آپریشن مزید تیز ،قومی معاملات پر کسی بھی دباؤ میں نہ آنے کا اعادہ
سلامتی کمیٹی اجلاس سے قبل پارلیمانی رہنماؤں کا بھی اجلاس ،وزیراعظم نے آئندہ کی حکمت عملی پر اتحادی جماعتوں کو اعتماد میں لیا ،اجلاس میں سیاسی و عدالتی ،خطے کی صورتحال، پاک امریکا تعلقات پر غور کیا گیا
وزیراعظم سے آرمی چیف جنرل عاصم منیر ، ڈی جی آئی ایس آئی ندیم انجم کی ملاقات ،وزیراعظم کا کالعدم تنظیم کے سربراہ کی گرفتاری پر فورسز ، اینٹلی ایجنس ایجنسیز سربراہان کو خراج تحسین ،قربانیاں رائیگاں نہیںجائیں گی، شہباز شریف
اسلام آباد (صحافی ۔ پی کے نیوز )سیاسی و عسکری قیادت نے ملک میں انسداددہشت گرد ی کا رروائیاں مزید تیز کرنے، قومی معاملات پر کسی بھی دباؤ میں نہ آنے کے عزم کا اعادہ کیا ہے اور کہا ہے کہ ملکی اندرونی اور بیرونی سلامتی پر کوئی سمجھوتہ نہیں کیا جائے گا۔ تفصیل کے مطابق وزیراعظم شہباز شریف کی زیر صدارت جمعہ کو قومی سلامتی کمیٹی کا 41 واں اجلاس منعقد ہوا جو 2 گھنٹے تک جاری رہا ۔اجلاس میں میں چیئرمین جوائنٹ چیفس سمیت تینوں مسلح افواج کے سربراہان، اطلاعات، دفاع، خزانہ، خارجہ اور وزارت داخلہ کے وزرا ء ،سندھ اور کے پی کے وزراء اعلی شریک ہوئے۔اجلاس میں ڈی جی آئی ایس آئی، ڈی جی آئی بی، ڈی جی ایم آئی اور ڈی جی ایم او سمیت دیگر عسکری اور سویلین حکام بھی شریک ہوئے جب کہ اجلاس میں کمیٹی ممبران اور چاروں وزرائے اعلیٰ بھی خصوصی طور پر شریک تھے۔ اجلاس میں امن و امان کی صورتحال داخلی اور خارجی اور معاشی صورتحال کا جائزہ لیا گیا۔ ذرائع کے مطابق اجلاس میں حساس اداروں کے سربراہان نے قومی سلامتی پر بریفنگ دی۔اجلاس کے دوران شرکا ء نے ملک کے مختلف حصوں میں شرپسندی کے خلاف جاری کارروائیوں پر اطمینان کا اظہار کیا، دہشت گردی کے واقعات میں شہید ہونے والوں کی خدمات پر خراج عقیدت پیش کیا، بلوچستان میں کالعدم تنظیم کے سربراہ کی گرفتاری پر اداروں کو خراج تحسین پیش کیا گیا ۔ذرائع کے مطابق قومی سلامتی کمیٹی نے انسداد دہشت گردی آپریشنز جاری رکھنے پر اتفاق کیا اور فیصلہ کیا گیا کہ دہشت گردوں کے خلاف زیرو ٹالرنس پالیسی جاری رہے گی۔ سیکیورٹی اداروں کے افسروں اور جوانوں کی قربانیوں رائیگاں نہیں جائیں گی۔اجلاس میں وزیر خزانہ اسحاق ڈار نے ملک کی معاشی صورتحال پر شرکا کو بریفنگ دی جس میں آئی ایم ایف سے مذاکرات اور دوست ممالک کے وعدوں سے بھی آگاہ کیا۔ذرائع کے مطابق قومی سلامتی کمیٹی نے قومی معاملات پر کسی بھی دباؤ میں نہ آنے کا عزم ظاہر کیا۔ کمیٹی نے کہا کہ ملکی اندرونی اور بیرونی سلامتی پر کوئی سمجھوتہ نہیں کیا جائے گا۔ سلامتی کمیٹی نے ملکی سلامتی اور استحکام کے لیے سب کو مل کر اپنا کردار ادا کرنے پر زور دیا۔ قومی سلامتی کمیٹی کے اجلاس سے قبل پارلیمانی رہنماؤں کے اجلاس میں وزیراعظم نے اتحادی جماعتوں کو اعتماد میں لیا ۔ پارلیمانی پارٹی رہنماؤں کے اجلاس میں خالد مقبول صدیقی، اسلم بھوتانی، خالد مگسی، خرم دستگیر، وفاقی وزیر قانون اعظم نذیر تارڑ و دیگر رہنما شریک ہوئے۔اجلاس میں موجودہ سیاسی و عدالتی صورتحال پر تبادلہ خیال کیا گیا۔ وزیراعظم نے پارلیمانی رہنماؤں کو آئندہ کی حکمت عملی پر اعتماد میں لیا۔ اہم اجلاس میں خطے کی صورتحال، پاک امریکا تعلقات پر غور کیا گیا۔علاوہ ازیں اجلاس میں ایران، افغانستان اور بھارت سمیت علاقائی صورتحال پر تبادلہ خیال کیا گیا۔ اجلاس میں ایران سعودی عرب تعلقات کی بحالی میں چین کے کردار پر بھی بات چیت ہوئی اور ملکی معاشی اور سیاسی صورتحال پر تفصیلی تبادلہ خیال کیا گیا۔علاوہ ازیں وزیراعظم شہباز شریف نے بلوچستان میں کالعدم تنظیم کے سربراہ کی گرفتاری پر سیکیورٹی فورسز اور اینٹلی ایجنس ایجنسیز کے سربراہان کو خراج تحسین پیش کرتے ہوئے کہا ہے کہ ملک میں امن و استحکام اور دہشتگردی کے خاتمے کیلئے جو قربانیاں دے رہی ہے وہ کبھی بھی رائیگاں نہیں جائیں گی۔ ذرائع کے مطابق آرمی چیف جنرل عاصم منیر اور ڈی جی آئی ایس آئی لیفٹیننٹ جنرل ندیم احمد انجم نے قومی سلامتی کمیٹی کے اجلاس سے قبل آرمی چیف جنرل عاصم منیر اور ڈی جی آئی ایس آئی لیفٹیننٹ جنرل ندیم احمد انجم نے وزیراعظم شہباز شریف سے ملاقات کی ، ملاقات میں قومی و داخلی سلامتی سے متعلق امور پر تبادلہ خیال کیا گیا، ملاقات میں افواج پاکستان کے پیشہ ورانہ اور آپریشنل امور پر بھی گفتگو کی گئی ۔ وزیراعظم شہباز شریف نے بلوچستان میں کالعدم تنظیم کے سربراہ کی گرفتاری پر سیکیورٹی فورسز اور اینٹلی ایجنس ایجنسیز کے سربراہان کو خراج تحسین پیش کیا ۔ وزیراعظم نے پاک فوج کی قربانیوں کو سراہتے ہوئے کہا کہ افواج پاکستان ملک میں امن و استحکام اور دہشتگردی کے خاتمے کیلئے جو قربانیاں دے رہی ہے وہ کبھی بھی رائیگاں نہیں جائیں گی۔