پاکستان میں سیاسی نسل کشی روکی جائے ،پی ٹی آئی نےعالمی تنظیموں کیساتھ معاملہ اٹھا دیا

یورپی پارلیمنٹ، ہاؤس آف کامن، آئی پی یو، سی پی اے، ہاؤس آف لارڈ، امریکی ایوان نمائندگان، ہائی کمشنر اوردیگر فورمز کو خطوط ارسال
نگراں حکومت نے آواز دبانے کیلئے شدید انسانی حقوق کی خلاف ورزیاں کیں،پارٹی قیادت پر 127 مقدمات درج کئے گئے،خط کا متن
اسلام آباد ( صحافی ۔ پی کےنیوز)تحریک انصاف نے امپورٹڈ حکومت کی جانب سے ملک میں انسانی حقوق کی سنگین خلاف ورزیوں اور قیادت و کارکنان کی غیر قانونی پکڑ دھکڑ،چھاپوں کا معاملہ بین الاقوامی تنظیموں کے ساتھ اٹھا لیا،سابق اسپیکر قومی اسمبلی و مرکزی رہنما تحریک انصاف اسد قیصر کی جانب سے معاملے پر بین الاقومی تنظیموں کو خطوط بھجوا دیئے گئے،اسد قیصر کی جانب سے یورپی پارلیمنٹ، ہاؤس آف کامن، آئی پی یو، سی پی اے، ہاؤس آف لارڈ، امریکی ایوان نمائندگان، ہائی کمشنر سمیت دنیا کے مختلف فورمز کو خطوط ارسال کئے گئے ۔سابق سپیکر اسد قیصر نے خطوط میں کہاکہ بطور سابق اسپیکر پاکستان میں انسانی حقوق کی خلاف ورزیاں علم میں لانا چاہ رہا ہوں،پاکستان تحریک انصاف ملک کی مقبول ترین سیاسی جماعت ہے،سیاسی ہارس ٹریڈنگ کے بعد پی ٹی آئی نے فریش مینڈیٹ کا فیصلہ کیا اور ایوان سے مستعفی ہوئے،خیبرپختونخوا اور پنجاب میں نگراں حکومتوں نے سیاسی ورکروں کی آواز دبانے کیلئے شدید انسانی حقوق کی خلاف ورزیاں کیں،سابق وزیراعظم عمران خان کو سیاست سے نکالنے کیلئے جھوٹے فوجداری مقدمات درج کیے گئے،عمران خان کو قاتلانہ حملے میں 11 گولیاں ماری اور 127 مقدمات درج کیے گئے،عمران خان کے گھر پر متعدد حملے اور کارکنان پر تشدد کیا گیا،پی ٹی آئی کارکن ضلے شاہ کو پنجاب پولیس حراست کے دوران تشدد سے قتل کیا گیا،عمران خان پر اپنے ہی کارکن علی بلال عرف ضلے شاہ کے قتل کا مقدمہ درج کیا گیا،خط میں مزید کہاگیا ہے کہ پی ڈی ایم پاکستان کی اعلیٰ عدلیہ پر جعلی آڈیو ویڈیو کے زریعے بلیک میلنگ حملے کرچکی ہے،پاکستان متعدد عالمی انسانی حقوق کنونشن پر دستخط کرچکا ہے،حکومتی کاروائیوں کو نا روکا گیا تو پی ٹی آئی پر غیر آئینی طور پر پابندی عائد کرنے کی کوشش کی جارہی ہے،الیکشن کمیشن نے غیر آئینی طور پر دو صوبوں میں سپریم کورٹ کے واضح احکامات کے باوجود انتخابات ملتوی کیے،وزیراعظم کی بھتیجی مریم نواز نے سیاسی ورکروں کو تعصب اور نسل پرستانہ قرار دیا،پاکستانی عوام کی سیاسی نسل کشی، جمہوریت کی تباہی کو روکنے میں کردار ادا کریں۔