پی ٹی آئی ،پنجاب حکومت میں ریلیوں اور سکیورٹی معاملات پر معاہدہ طے

تحریک انصاف لاہور میں اتوار کے بجائے پیر کو جلسہ کرے گی،جلسے کی اجازت کے لیے انتظامیہ سے رابطہ کیا جائے گا
تحریک انصاف ریلی نکالنے سے 2 دن پہلے آگاہ کریگی ، وارنٹس کی تکمیل کیلئے پولیس کے ساتھ تعاون کرے گی،میڈیا رپورٹ
لاہور ( صحافی ۔ پی کے نیوز ) پنجاب حکومت اور پی ٹی آئی کے درمیان معاہدہ طے پا گیا، تحریک انصاف اور پنجاب حکومت کے درمیان ریلیوں،سکیورٹی اور قانونی معاملات کے ٹی او آرز طے پا گئے ہیں۔میڈیارپورٹس میں کہا گیا ہے کہ معاہدے کے مطابق تحریک انصاف وارنٹس کی تکمیل اور سرچ وارنٹس کیلئے پولیس کے ساتھ تعاون کرے گی،تحریک انصاف 14اور 15 مارچ کو درج ہونے والے مقدمات کی تفتیش میں بھی تعاون کرے گی۔تحریک انصاف کی جانب سے شبلی فراز اور علی خان اور پولیس کی طرف سے ایس ایس پی عمران کشور فوکل پرسن ہوں گے۔ معاہدہ کے مطابق عمران خان کی سکیورٹی کیلئے بنائی گئی گائیڈ لائن پر عمل ہو گا،پی ٹی آئی سکیورٹی کیلئے متعلق حکام کو درخواست دے گی۔ تحریک انصاف لاہور میں اتوار کے بجائے پیر کو جلسہ کرے گی،جلسے کی اجازت کے لیے انتظامیہ سے رابطہ کیا جائے گا،تحریک انصاف ریلی نکالنے سے کم از کم 2 دن پہلے آگاہ کرے گی۔پنجاب حکومت اور پی ٹی آئی کے درمیان طے پانے والے معاہدے کو لاہور ہائیکورٹ میں پیش کیا جائے گا۔ یاد رہے کہ دو روز قبل لاہور ہائیکورٹ نے پی ٹی آئی کو چیف سیکرٹری اور آئی جی پنجاب کے ساتھ بیٹھنے اور میکانزم بنانے کی ہدایت کی تھی،عدالت نے تحریک انصاف کو اتوار کو لاہور میں جلسہ کرنے سے روک دیا تھا۔