الیکشن کمیشن کے وفد کی گورنر سے ملاقات ،پنجاب میں انتخابات بارے کل فیصلہ ہوگا

الیکشن کمیشن کے وفد کی گورنر سے ملاقات ،پنجاب میں انتخابات بارے کل فیصلہ ہوگا
جس وقت الیکشن کمیشن کہے گا انتخابات کروائیں گے،اگرمجھے کہا گیا تو 15 دن میں الیکشن کر ا کے گھر چلا جائوں گا، گرفتاریاں جنہوں نے کرنی ہیں وہ کریں، یہ میرا مینڈیٹ نہیں، نگران وزیر اعلیٰ
چیف الیکشن کمشنر کی زیرصدارت اہم اجلاس، سیکرٹری الیکشن کمیشن کی سربراہی میں وفد گورنر پنجاب سے الیکشن کی تاریخ پر مشاورت کرے گا ، وفد میں سیکرٹری،سپیشل سیکرٹری اور ڈی جی لاءشریک ہوں گے
ایل سی نہ کھولنے کی وجہ سے ادویات منہگائی ہو رہی ہیں، عمران خان بندے اکھٹے کر رہے ہیں، منع کریں گے تو مجھ پر تنقید ہوگی، کوئی بھی قانون کو ہاتھ میں لے گا تو قانون حرکت میں آئے گا، محسن نقوی
لاہور(صحافی ۔ پی کے نیوز)پنجاب اسمبلی کے انتخابات پر مشاورت کیلئے الیکشن کمیشن کا وفد گورنر پنجاب بلیغ الرحمان سےکل ملاقات کرے گا۔ چیف الیکشن کمشنر کی زیرصدارت الیکشن کمیشن کا اہم اجلاس ہوا جس میں ممبران و سیکرٹری الیکشن کمیشن شریک ہوئے ، اجلاس میں فیصلہ کیا گیا کہ الیکشن کمیشن گورنر پنجاب سے ملاقات کرے گا۔ اس حوالے سے الیکشن کمیشن نے گورنرپنجاب کو خط لکھ دیا۔ الیکشن کمیشن نے گورنر پنجاب سے ملاقات کے لئے وقت مانگ لیا ہے ، سیکرٹری الیکشن کمیشن کی سربراہی میں وفد گورنر پنجاب سے الیکشن تاریخ پر مشاورت کرے گا ، الیکشن کمیشن کے وفد میں سیکرٹری،سپیشل سیکرٹری اور ڈی جی لاءشریک ہوں گے۔دوسری جانب نگران وزیر اعلی پنجاب محسن نقوی نے کہا ہے کہ جس وقت الیکشن کمیشن کہے گا انتخابات کروائیں گے۔ نگران وزیر اعلی پنجاب محسن نقوی نے لاہور میں سینئر صحافیوں سے ملاقات کے دوران کہا کہ اگر مجھے کہا گیا تو 15 دن میں الیکشن کروا کے گھر چلا جاو¿ں گا۔انہوں نے کہا کہ تھوڑے عرصے میں کچھ بہتری کرنے کے لیے آیا ہوں، گرفتاریاں جہنوں نے کرنی ہیں وہ کریں، یہ میرا مینڈیٹ نہیں، جنہوںنے تنقید کرنی ہے وہ کریں میں سب کی عزت کرتا ہوں، الیکشن کمیشن کے مینڈیٹ پر ہی تقرر و تبادلے کر رہے ہیں۔انہوں نے کہا کہ ایل سی نہ کھولنے کی وجہ سے ادویات منہگائی ہو رہی ہیں، عمران خان بندے اکھٹے کر رہے ہیں، منع کریں گے تو مجھ پر تنقید ہوگی، ہمارے پاس طاقت منتخب حکومت سے بھی آدھی ہے۔نگران وزیر اعلی پنجاب نے کہا کہ کوئی بھی قانون کو ہاتھ میں لے گا تو قانون حرکت میں آئے گا۔انہوں نے کہا کہ ترقیاتی کاموں کے حوالے سے ابھی تک کوئی فنڈ ریلیز نہیں کیا گیا۔ محسن نقوی نے کہا کہ صوبے میں بسنت نہیں منائی جائے گی، اس پر سختی سے عملدرآمد ہوگا، کسی بھی جگہ ایسا ہوا تو فوری ایکشن ہوگا، کسی کو اسے اقدام کی اجازت نہیں دیں گے جس سےجان جانے کا خطرہ ہو۔