ڈالر کو ریورس گئیر لگ گیا، چار روپے تینتالیس پیسے سستا ہوگیا

،لاہور(صحافی ۔ پی کے نیوز)ڈالر کو ریورس گئیر لگ گیا، چار روپے تینتالیس پیسے سستا ہوگیا۔ انٹر بینک میں ڈالر 4 روپے 43 پیسے سستا ہونے کے بعد 265 روپے 20 پیسے پر ٹریڈ کر رہا ہے،اوپن مارکیٹ میں ڈالر 270 سے 273 روپے میں فروخت ہو رہا ہے۔یاد رہے کہ گزشتہ روز انٹر بینک میں ڈالر 7 روپے مہنگا ہوا۔فاریکس ڈیلرز نے کہا کہ انٹر بینک میں ڈالر7 مہنگا ہونے کے بعد 269 روپے 10 پیسے پر فروخت ہوا،بینک درآمد کنند گان کو ڈالر 270 روپے 80 پیسے میں فروخت ہوا۔ اوپن مارکیٹ میں ڈالر 267 سے 270 روپے تک فروخت ہوا۔ایک ہفتے کے دوران ڈالر کے مقابلے میں پاکستانی روپیہ بد ترین گراوٹ کا شکار رہا،اس دوران انٹر بینک میں ڈالر 33 روپے 50 پیسے مہنگا ہوا جبکہ اوپن مارکیٹ میں ڈالر 30 روپے 50 پیسے بڑھ گیا ۔فاریکس ایسوسی ایشن آف پاکستان کی رپورٹ کے مطابق ڈالر نے روپے کی قدر کو گرا دیا اور بلندیوں کے تمام سابقہ ریکارڈ توڑ دئیے،ایک ہفتے کے دوران انٹر بینک میں ڈالر کی قدر230 روپے سے بڑھ کر264 روپے اور اوپن مارکیٹ میں ڈالر کی قدر240 روپے سے بڑھ کر271 روپے کی بلند ترین سطح پر جا پہنچی۔ فاریکس رپورٹ کے مطابق اس عرصے میں یورو کی قدر میں16روپے 50 پیسے کا اضافہ ہوا جس سے یورو کی قیمت فروخت 275 روپے سے بڑھ کر291 روپے 50 پیسے ہو گئی جبکہ20 روپے کے نمایاں اضافے سے برطانوی پونڈ کی قیمت فروخت 312 روپے سے بڑھ کر 332 روپے پر جا پہنچی۔