اب پیچھے مڑکر دیکھنے کا وقت نہیں جارحانہ انداز اپنانا ہوگا،نوازشریف

اب پیچھے مڑکر دیکھنے کا وقت نہیں جارحانہ انداز اپنانا ہوگا،نوازشریف
دوستوں اور اتحادیوں کی وجہ سے ملک بچانے کیلئے حکومت لینا پڑی، پنجاب میں بعض فیصلے درست نہیں تھے جس کی وجہ سے سیاسی نقصان ہوا
جب کہیں گے وطن واپس آ جائوں گا، انتخابی مہم خود چلانا چاہتا ہوں، آپ لوگ مریم نواز کے ہاتھ مضبوط کریں یہ پارٹی میں نئی روح پھونکیں گی
چاہتا ہوں اعلی عدلیہ میرے ساتھ کی گئی نا انصافی کا ازالہ کرے،قائدن لیگ کی زیرصدارت لندن اجلاس کی اندرونی کہانی سامنے آگئی
لندن/ اسلام آباد (صحافی ۔ پی کے نیوز) قائد ن لیگ نواز شریف نے کہا ہے کہ اب پیچھے مڑکر دیکھنے کا وقت نہیں جارحانہ انداز اپنانا ہوگا، پنجاب میں بعض فیصلے درست نہیں تھے جس کی وجہ سے سیاسی نقصان ہوا۔ جب کہیں گے وطن واپس آ جائوں گا، انتخابی مہم خود چلانا چاہتا ہوں۔ ذرائع کے مطابق نواز شریف نے لندن میں چار گھنٹے تک جاری اجلاس میں پارٹی کے سینئیر رہنمائوں سے مشاورت کی، لندن اجلاس کی اندرونی کہانی سامنے آگئی ہے ۔ ذرائع کاکہناہے کہ کہ اجلاس کا فوکس مسلم لیگ ن کا سیاسی مستقبل تھا۔ نوازشریف نے بعض امور پر کھل کر اپنی رائے کا اظہار کیا۔ ذرائع کے مطابق نواز شریف کا کہنا تھا کہ اگر میری بات مان لی جاتی اور عمران خان کی حکومت مدت پوری کرتی تو حالات مختلف ہوتے اور ن لیگ دو تہائی اکثریت سے انتخابات میں کامیاب ہوتی۔ نواز شریف نے کہا کہ دوستوں اور اتحادیوں کی وجہ سے ملک بچانے کیلئے حکومت لینا پڑی۔ اب پیچھے مڑکر دیکھنے کا وقت نہیں جارحانہ انداز اپنانا ہوگا۔ ذرائع کے مطابق نواز شریف نے کہا کہ پنجاب میں بعض فیصلے درست نہیں تھے جس کی وجہ سے سیاسی نقصان ہوا۔ پرویز الٰہی کے اعتماد کے ووٹ والا معاملہ بھی بہتر انداز میں ہینڈل ہوسکتا تھا۔ اب دور رس اور قابل عمل جرات مندانہ فیصلوں سے ن لیگ کو پورے پاکستان میں آگے لانا ہے۔ آپ لوگ مریم نواز کے ہاتھ مضبوط کریں یہ پارٹی میں نئی روح پھونکیں گی۔نواز شریف کا کہنا تھا کہ ہم تمام بڑے سیاسی فیصلے مشاورت سے کرینگے۔ چاہتا ہوں کہ اعلی عدلیہ میرے ساتھ کی گئی نا انصافی کا ازالہ کرے۔ مجھے جب کہیں گے وطن واپس آجاؤں گا، انتخابی مہم چلانا چاہتا ہوں۔ نواز شریف کا کہنا تھا کہ اسٹیبلشمنٹ اور نئی فوجی قیادت نے عملی طور پر خود کو سیاست سے دور رکھا ہوا ہے۔ معاشی صورتحال پر بہت پریشان ہوں مگر اس تباہی کا ذمہ دار عمران خان ہے۔ ذرائع کے مطابق اجلاس میں وزیر خزانہ اسحاق ڈار کی معاشی صورتحال پر بریفنگ سے بھی نوازشریف غیر مطمئن نظر آئے۔ نواز شریف نے کہا کہ عوام کو ریلیف دینے کیلیے عملی اقدامات چاہتا ہوں۔