سیٹ ایڈجسٹمنٹ کی منظوری ،آج اہم اجلاس ،ق لیگ کیساتھ مل کر الیکشن لڑینگے، عمران خان

سیٹ ایڈجسٹمنٹ کی منظوری ،آج اہم اجلاس ،ق لیگ کیساتھ مل کر الیکشن لڑینگے، عمران خان
ق لیگ کے ساتھ قومی و صوبائی اسمبلی میں 15 سے 20 سیٹوں پر ایڈجسٹمنٹ متوقع ،ان حلقوں کو ترجیح دی جائے گی جہاں سے ق لیگ جیتی تھی
قیادت ق لیگ کے ساتھ نہ الجھے، ہمارے بیانیے میں کوئی تبدیلی نہیں آئے گی، سربراہ تحریک انصاف عمران خان کا پرویز الہٰی کے انٹرویو کے بعد رد عمل
اسلام آباد،لاہور (صحافی ۔ پی کے نیوز) مسلم لیگ ق کے رہنما و وزیر اعلیٰ پنجاب چودھری پرویز الٰہی کے انٹرویو کے بعد چیئرمین پی ٹی آئی عمران خان نے کہا ہے کہ ق لیگ اور تحریک انصاف کا موقف الگ ہو سکتا ہے لیکن ق لیگ کے ساتھ مل کر الیکشن میں اتریں گے۔پی ٹی آئی اراکین کو ہدایت دیتے ہوئے سابق وزیر اعظم کا کہنا تھا کہ تحریک انصاف کی قیادت ق لیگ کے ساتھ نہ الجھے، پاکستان تحریک انصاف اپنے بیانیے میں کوئی تبدیلی نہیں لائے گی۔ذرائع کے مطابق پاکستان تحریک انصاف نے مسلم لیگ ق کے ساتھ مل کر الیکشن لڑنے کا فیصلہ کیا ہے۔قبل ازیں ذرائع کے مطابق چیئرمین پاکستان تحریک انصاف اور سابق وزیراعظم عمران خان نے ق لیگ کیساتھ سیٹ ایڈجسٹمنٹ کے لیے تین رکنی کمیٹی تشکیل دے دی۔ذرائع کا کہنا ہے کہ کمیٹی میں سابق وفاقی وزراء شاہ محمود قریشی، فواد چودھری اور پرویز خٹک شامل ہیں جبکہ کمیٹی منگل کے روز سابق وزیراعظم عمران خان سے سیٹ ایڈجسٹمنٹ کے حوالے سے مشاورت کرے گی۔ذرائع نے مزید بتایا ہے کہ ق لیگ کے ساتھ قومی و صوبائی اسمبلی میں 15 سے 20 سیٹوں پر ایڈجسٹمنٹ متوقع ہے جبکہ سیٹ ایڈجسٹمنٹ میں ان حلقوں کو ترجیح دی جائے گی جہاں سے ق لیگ جیتی تھی۔ پاکستان تحریک انصاف اور مسلم لیگ ق کے درمیان سیٹ ایڈجسٹمنٹ کے معاملے پر قائم کمیٹی کا اجلاس آج(منگل کو ) ہو گا۔شاہ محمود قریشی کی سربراہی میں کمیٹی کا اجلاس آج ہو گا ،کمیٹی پنجاب میں ٹکٹوں کی تقسیم پر تفصیلی مشاورت کریگی،کمیٹی میں پاکستان تحریک انصاف سے شاہ محمود قریشی، پر ویز خٹک اور فواد چوہدری شامل ہوں گے۔ واضح رہے کہ ق لیگ نے پی ٹی آئی سے 15 سے 20سیٹوں پر سیٹ ایڈجسٹمنٹ کا مطالبہ کر رکھا ہے ۔ #/s#